Fagseksjon for norsk har over tretti tilsette med brei og djup kunnskap i ulike norskfaglege disiplinar og tilhøyrande didaktikk. Vi forskar og underviser innanfor språk- og litteraturvitskap, lese-, skrive- og tekstvitskap, munnlegheit, digitalisering og kunstig intelligens, tverrestetikk og meir.

Undervisingsporteføljen vår femner om grunnskulelærarutdanning, lektorutdanning, praktisk-pedagogisk utdanning, etter- og vidareutdanning og ph.d.-utdanning. Studentane våre blir kvalifiserte til å undervise i norsk i skulen eller vaksenopplæringa og til å ta vidare forskarutdanning.

Gjennom norskfaget får elevar tilgang til menneskelege språk- og uttrykksformer. Faget skal stimulere til tenking og diskusjonar, og det skal tilby estetiske opplevingar. Utan å tenke og snakke fritt og utan å oppleve kultur forvitrar mennesket. Derfor trengst norsklærarar.