Aktivitetar i forskargruppa

Den nordiske forskarskulen for museum og kulturarv (NorMus) (2025–2033)

I mars 2025 løyvde Noregs forskingsråd totalt 16 millionar kroner til NorMus – Nordisk forskarskule for museum og kulturarv. I samarbeid med Senter for museumsstudiar ved Universitetet i Oslo, Museologi ved Umeå universitet og Museologi ved Aarhus Universitet, og Norges museumsforbund, er forskargruppa Museologi og museumsforsking ved NTNU del av arbeidsgruppa for forskarskulen.

Meir informasjon om Den nordiske forskarskulen for museum og kulturarv

Det museale – nasjonal fagkonferanse for kulturforsking i Trondheim (3.–5. juni 2026)

Forskargruppa er arrangør av «Det museale – nasjonal fagkonferanse for kulturforsking» i Trondheim og omegn frå 3. til 5. juni 2026. I samarbeid med museum og andre kulturarvsinstitusjonar i Trøndelag, og Forening for kulturforskning, planlegg og gjennomfører forskargruppa denne fagkonferansen som ei aktiv samhandling. Målet er å byggje eit tverrsektorielt forskingsmiljø med aktørar frå museum, universitet og andre kulturarvs- og kunnskapsinstitusjonar.

Bidragslokk (call for contributions, papers and sessions) er tilgjengeleg på konferansens nettside: Det museale – nasjonal fagkonferanse for kulturforskning i Trondheim

Musikk som kulturarv i Noreg (fagantologi 2027)

I samarbeid med Norges musikkmuseum, det vil seie Ringve Musikkmuseum og Rockheim, er forskargruppa representert i redaksjonen og referansegruppa for fagantologien Musikk som kulturarv i Noreg (arbeidstittel). Målet med antologien er å presentere eit breitt og mangfaldig bilete av fortidas og notidas kulturarvifisering av musikk – både frå minoritets-, urfolks- og majoritetsperspektiv, og gjennom offentlege institusjonar, kommersielle selskap og frivillige musikkfellesskap på internett, med meir. Fagantologien blir gitt ut i samband med Ringve Musikkmuseums 75-årsjubileum (1952–2027).
Meir informasjon: Musikk som kulturarv – antologi 2027

Prosjekt med tilskot frå Kulturdirektoratet (2025–2027)

I perioden 2025–2027 deltar forskarar i forskargruppa i to nasjonale prosjekt om aktiv samhandling med tilskot frå Kulturdirektoratet:

• Carving out a space har Randsfjordmuseet som prosjekteigar. Målet er å etablere eit varig forum for å drøfte og utvikle metodar for tverrfagleg kunnskapsarbeid og permanente strukturar for samhandling mellom museumssektoren og universitets- og høgskulesektoren. I dette nasjonale prosjektet deltar museum, universitet og høgskular frå ulike delar av Noreg.
• Varig kompetanseløft har Norsk Industriarbeidermuseum som prosjekteigar. Målsettinga er å innlemme forsking i annan museumspraksis, styrke støttefunksjonane for forsking i musea, og styrke samarbeidet med universitets- og høgskulesektoren. Minnestads-, museums- og universitetsinstitusjonar frå ulike delar av Noreg deltek i dette nasjonale prosjektet.

Museologisk boksirkel (2023– )

Sidan våren 2023 har forskargruppa møttest jamleg til Museologisk boksirkel i Trondheim. Medlemmene les og drøftar både historisk og samtidsretta museologisk litteratur. Viktige tema i boksirkelen er museologiens historiografi, vitskapsteori, forskingsfelt og kunnskapstradisjonar hos interessegrupper, lokalsamfunn og minoritets-, urfolks- og majoritetsgrupper, og i anglosaksiske, latinamerikanske, nordiske, samiske, sentraleuropeiske og vesteuropeiske museologiar og museumsstudiar.