NTNU Discovery gir støtte til både tilsette og studentar som ønskjer å ta ideane eller forskingsresultata sine vidare. Det kan vere støtte til å utvikle produktinnovasjonar, prosessinnovasjonar, marknadsinnovasjonar eller organisasjonsinnovasjonar. Det kan søkjast støtte både til forprosjekt og hovudprosjekt.

NTNU Discovery

Universitetsskulane i Trondheim (USSiT) er eit samarbeid mellom Trondheim kommune, Trøndelag fylkeskommune og NTNU. Samarbeidet vart etablert i 2015, og har gått frå å vere eit mellombels prosjekt til å få ein tiårig rammeavtale. Føremålet er at alle partane skal bli styrkte, og at resultata skal delast med andre skular i regionen og andre lærarutdanningsinstitusjonar. Dette gjer dei ved å samarbeide om forskings- og utviklingsprosjekt, som gir noko tilbake til alle dei involverte.

Universitetsskulane i Trondheim (USSiT)

Målet om å redusere talet på drukningsulykker blir nådd ved å tilby eit fleksibelt og skalerbart symjeopplæringskurs på fleire språk. Forskingsprosjektet Water Competence har utvikla symjeeappen «Water competence». Undervisningsdesignet nyttar smarttelefonteknologi (applikasjon/app) og video, samt omvendt undervisning («flipped classroom») som metodisk tilnærming i basseng og ved vatn.
Symjeappen har over 350 øvingsbilete/-filmar i HD-format og inneheld det ein treng for å nå kompetansemåla på 2., 4., 7. og 10. trinn. Med storskjerm i symjehallen eller vassføre iPadar har lærarar/instruktørar høve til å formidle rørsleoppgåver på ein effektiv og korrekt måte. Elevane kan sjå arbeidsoppgåvene i forkant, undervegs eller i etterkant for refleksjon.

Førebels er appen omsett til svensk og engelsk, men han vil etter kvart vere tilgjengeleg på spansk, arabisk og kinesisk. Prosjektet er finansiert av NTNU Discovery og Innovasjon Noreg.

Les kronikk om prosjektet i Gemini.

Forskingsgruppa «Læring og undervising av matematikk med digitale verktøy», leia av Øistein Gjøvik, utviklar ei nettside/web-applikasjon «WeBabble» som gir lærarstudentar høve til å øve seg på matematiske samtalar med fiktive elevar. Dei har tidlegare fått midlar gjennom studiekvalitetstilskot, men for å få på plass ein demoversjon har dei vore avhengige av meir finansiering – og har no fått tildelt midlar frå NTNU Discovery som gjer det mogleg å få ein demo ferdig utvikla.

Grunnstoffblokka er ein nyskapande, studentaktiv digital læringsressurs som gir innsikt i sentralt fagstoff i naturfag (grunnstoffa og periodesystemet og naturvitskaplege praksisar og tenkjemåtar). Lærarstudentar og lærarar kan også bruke Grunnstoffblokka som grunnlag for å utvikle naturfagundervisning som er relevant og motiverande for elevane sine.

Forprosjektmidlane skal brukast til å utvikle ein tidslinjemodus som synleggjer korleis ei rekkje ulike vitskapsfolk har nytta ulike metodar for å kome fram til kunnskapen vi har om grunnstoffa og periodesystemet i dag. Prosjektet er eit samarbeid med det digitale historieforteljingsfirmaet Ablemagic.

Prosjektleiar: Unni Eikeseth

Interne prosjektmedarbeidarar: Annette Lykknes

SNiPe er ein undervisnings‑webapplikasjon som gjer det mogleg for undervisarar å få innsikt i studentane sine løysingsprosessar i sanntid. Dette gir høve til felles refleksjon, problematisering og umiddelbar tilbakemelding. I tillegg kan ho brukast til at undervisarar kan forske på eigen undervisningspraksis, analysere og vurdere didaktiske og pedagogiske val, og for forskarar og undervisarar til å samle data til grunnforsking.
Føremålet med forprosjektet er å leggje til rette for utvikling av ein prototype, samt spesifisere ein kostnadsoversikt til ein søknad om hovudprosjekt.

Prosjektleiar: Tore Forbregd

Interne prosjektmedarbeidarar: Hermund Andre Torkildsen

Fuggelmyra er eit fiktivt univers som er utvikla for å kunne byggje case som passar inn i undervisning, både fagleg og fleirfagleg. Denne undervisningsressursen bidreg til at studentar kan knyte teori til praksis og gi dei eit meir reelt og heilskapleg innblikk i mangfaldet i skulekvardagen. Dette blir ein ufarlig øvingsarena for å reflektere over ulike faglege, pedagogiske og etiske dilemma. Forprosjektmidlane skal brukast til å digitalisere Fuggelmyra.

Prosjektleiar: Åsa Dahl Berge

Interne prosjektmedarbeidarar: Lillian Kirkvold, Ole Enge, Marit Buset Langfeldt, Jørn Ove Asklund, Ingrid Remmen Semmingsen, Marte Helland Fiskvik, Cecilie Slinning Knudsen, Kathrine Lervold og Theresa Kerstin Ristad.

VR Teaching Teachers – eit innovativt undervisningskonsept med støtte frå NTNU Discovery

Den flyktningekompetente læraren har eit underprosjekt som utforskar bruk av VR-teknologi. VR Teaching Teachers er eit innovativt undervisningskonsept som tek i bruk VR-teknologi for å skape ei meir heilskapleg forståing av kva behov barn og unge med flyktningbakgrunn kan ha. Dette konseptet kan bidra til omstilling i korleis studentar, lærarar og lærarutdannarar møter flyktningar og arbeider med inkludering. Målsetjinga for konseptet er å gi eit betre grunnlag for læring og inkludering i ei autentisk ramme.

Undervisningsmaterialet er utvikla i samarbeid med flyktningar og personalet ved institusjonen. At materialet er autentisk, meiner vi er viktig for opplevinga og utbyttet brukarane får av konseptet. VR-historia kan sjåast på som ei annleis «teaching-opportunity», med teknologi som let deg vere nær menneske eller ein situasjon utan å vere der. På denne måten kan konseptet bidra til internasjonalisering heime.

VR-prosjektet er eit forprosjekt våren 2025, støtta av NTNU Discovery.