“Ein fødast ikkje som kvinne, ein blir det”, skriv Simone de Beauvoir i boka Det andre kjønnet frå 1949. Kjønn er tvitydig, noko som er reflektert i våre handlingar og måtar å persipere, relatere, tale og omtale kvarandre på. Forum for feministisk filosofi vil ta for seg ulike aspekt ved feministisk tenking omkring, kjønn, seksualitet, kropp, subjekt-danning, politikk og makt. Perspektiva vil omfatta fenomenologiske, så vel som psykologiske, psykoanalytiske og seinare post-strukturalistiske og diskurs-teoretiske perspektiv på kjønn.

I dagens samfunn og kultur bryt tradisjonelle ideal og oppfatningar omkring kjønn mot tendensar til større openheit og tvimeining. Finst det naturlege kjønnet? Eller er kjønn og kjønna eksistens måtar å handla på i tråd med etablerte kulturelle normer og ideal? Korleis blir kjønnet etablert sjølv i relasjonar til andre? Og på kva måte er kjønn knytt til makt? Korleis gjer kjønn og eit kjønna perspektiv seg gjeldande i populærkultur, så vel som i litteratur, film og annan kunst? Finst det eit feminint subjekt? Eller ein feminint politisk ståstad? Korleis gjer erfaringar med eigen kroppslegheit seg gjeldande i ein etisk og identitetspolitisk diskurs?

Forumet har som formål å inspirere til debatt og refleksjon omkring kjønn, makt og seksualitet, i tillegg til å samle studentar på tvers av fag for fruktbar fagleg utveksling. Seminaret skal vere ope og ha låg terskel. Diskusjonane vil ta utgangspunkt i presentasjonar frå studentane sin side eller tilsette med faglege perspektiv på feminisme.  For å få tilgang på tekstar og anna materiale må ein registere seg på seminaret si emne-side i Blackboard ved å sende e-post til Ståle Finke. 

Samarbeidspartnarane våre er: Kvinnenettverket ved Institutt for filosofi og religionsvitskap ved NTNU, Senter for tverrfagleg kjønnsforsking (UiO) og Senter for kjønnsforsking ved Institutt for tverrfaglege kulturstudium ved NTNU.