AD skal vere internasjonalt anerkjent i tett samspel med NTNU sin hovedprofil

Fakultetet tilfører NTNUs teknisk-naturvitskaplege profil estetiske perspektiv og skapande praksisar som styrker samfunnsrelevans og samarbeid på tvers av fag og sektorar. Ei heilskapleg forståing av menneskesentrert teknologiutvikling ligg til grunn for fakultetet sitt særlege ansvar for å identifisere komplekse samfunnsutfordringar og utvikle tverrfaglege løysingar. 

Vårt forskings- og utviklingsarbeid innan transformasjon og sirkularitet, bygde miljø som er energipositive, smarte og berekraftige, menneskesentrert teknologi, etisk ansvarleg arkitektur og design, og kunstnarisk og kreativt entreprenørskap, gjer fakultetet internasjonalt leiande.  
Ved AD tek vi ei tydeleg rolle i å utforske og forme korleis kunstig intelligens og nye teknologiar påverkar og utviklar fagområda våre. Menneskesentrerte og deltakande prosjekt står sentralt i forskingsaktivitetane ved fakultetet. Samtidig integrerer vi meir-enn-menneskelege perspektiv og anerkjenner samspelet mellom menneskelege, ikkje-menneskelege og teknologiske aktørar. 

Vi har fleire internasjonalt framifrå forskingsmiljø. Vi leier og koordinerer både nasjonale og internasjonale forskingsprosjekt og skaper arenaer for nytenking og innovasjon, lokalt, nasjonalt og globalt. Gjennom å demonstrere nye måtar å adressere store samfunnsspørsmål og uløyste problem på, styrker fakultetet NTNU sin posisjon som eit leiande internasjonalt universitet som lever opp til visjonen om kunnskap for ei betre verd. Dette skjer både gjennom vitskapleg forsking, praksis og kunstnarisk utviklingsarbeid. 

Gjennom utdanningane våre er vi ei drivkraft for samfunnsendring, og studieporteføljen skal vise retning for utviklinga av fagområda våre. Samspelet vårt med breidda av NTNUs fagområde bidreg til ein unik og attraktiv studieportefølje nasjonalt og internasjonalt. 

Utdanninga vår skal vere av høg kvalitet med nære koplingar til forsking, kunstnarisk utviklingsarbeid og innovasjon. Problem- og prosjektbasert læring gjennom kreative metodar står sentralt, og studentane våre engasjerer seg i problemstillingar som kan gi relevante løysingar på framtidas behov. Signaturpedagogikken vår vektlegg praktiske og skapande eksperiment, og vi siktar mot internasjonal anerkjenning for utvikling og forsking innan fagdidaktikk i fagområda våre. Vi skal styrke studentane våre med kreativ sjølvtillit og kritisk tenking for eit yrkesliv prega av læring og arbeid til fordel for framtidige generasjonar. 

AD former fremtidas berekraftige samfunn

Fakultetet skal bidra til ei kunnskapsbasert samfunnsutvikling, setje dagsordenen overfor politikarar og beslutningstakarar og vere ei tydeleg stemme i det offentlege ordskiftet. 

Faga våre skal bidra til å bremse klima- og naturkrisene og byggje eit samfunn med høgare motstandskraft og betre kriseberedskap. AD vil bruke dei globale nettverka sine til å samarbeide om og støtte den grøne omstillinga og til å fremje både klimarettferd og klimarettar. Økonomisk og klimaorientert berekraft blir sikra gjennom løysingar som balanserer kostnader, kvalitet og ressursbruk, og grøn omstilling blir styrkt gjennom arbeid med energi, ombruk, sirkularitet og transformasjon. Vi inngår partnarskap for å utvikle kunnskap og løysingar som støttar berekraftig samfunnsutvikling og klimatilpassing. 

Vi bruker kompetansen vår i formgiving, estetikk og visuelle og romlege uttrykk for å skape løysingar som er berekraftige, sosialt inkluderande og vakre. Kunst og estetikk har kraft til å skape forståing, påverke og motivere til handling og fungerer i tillegg som beredskap. 

AD styrker samspelet mellom teknologi, menneske og natur for å forbetre kvaliteten på våre omgjevnader og bygde miljø. Vi arbeider med sosial berekraft ved å møte demografiske endringar og utfordringar i offentlege tenester. AD skal bidra til å styrkje berebjelkane i velferdssamfunnet, og gjennom kunnskapsbygging innan design, arkitektur og planlegging skal vi bidra til betre inkludering i samfunnet. 

Vi sørger for at ny kunnskap blir spreidd gjennom formidling og blir teken i bruk i samarbeid mellom fagmiljøa våre, forskingsinstitutt, næringslivet, offentleg sektor og sivilsamfunnet. Dei arbeidslivsrelevante utdanningane våre blir vidareutvikla gjennom partnarskap med eksterne aktørar, og alumnane til fakultetet er våre beste ambassadørar.  

AD samarbeider med partnarar regionalt, nasjonalt og internasjonalt og skal spele ei nøkkelrolle ved NTNU i å utvikle likeverdige samarbeid med låg- og mellominntektsland. 

AD skal vere eit attraktivt og inkluderande akademisk fellesskap

Vi bygger kulturen vår på kollektive tilnærmingar, respekt og samarbeid. Fakultetet utmerker seg gjennom sterke faglege fellesskapar, programdriven utvikling av studieporteføljen og arenaene våre for samhandling i eit kreativt studiemiljø. 

Vi skal rekruttere vitskapleg tilsette med høg fagleg og akademisk kompetanse. Dei skal velje AD fordi vi tilbyr fagmiljø som utmerker seg på nasjonale og internasjonale konkurransearenaer, med si evne til å identifisere avgjerande forskingsspørsmål, og måtar å svare på dei på. Rekruttering og utviklinga av dei tilsette skal bygge på kvalitet, samspel og ein sterkt fagleg fellesskap. 

Studentane våre vel NTNU og Fakultet for arkitektur og design fordi det å studere her betyr å vere del av eit læringsmiljø prega av tverrfaglegheit og av høge ambisjonar. Studentane skal oppleve at undervisninga er kopla til pågåande forsking, og dei skal oppleve fagleg utvikling i eit inspirerande miljø. Som ferdige kandidatar skal dei gle seg over tida dei var studentar ved AD, og sjå nytta i å ha studert faga våre. Alle tilsette ved fakultetet, uansett stillingstype, skal ha moglegheiter for karriereutvikling og oppleve å vere del av ein større fellesskap som skaper resultat saman.  

Fakultetet skal styrke og spreie kunnskap om korleis komplekse samfunnsutfordringar kan møtast med kritisk forståing og kreative, skapande ferdigheiter. Dette gir oss ei tydeleg fagleg stemme og gjer oss til ein attraktiv samarbeidspartnar for andre fagmiljø, institusjonar og samfunnsaktørar.