Ambisjon 1

IKM skal vera eit attraktivt akademisk fellesskap for tilsette og studentar

IKM skal vera eit attraktivt institutt for både studentar og tilsette. Tilsette skal trivast på jobb, og kjenne på at dei får bruka sin kompetanse og sine evner til beste for instituttet og det faglege fellesskapet.

Det skal leggjast til rette for samanhengande forskingstid og mobilitet for tilsette med forskingstid i stillingane. Vi skal ha klåre og rettferdige prosedyrar for forskingstermin, slik at vitskapleg tilsette med forsking i stillinga får sjansen til å ha forskingstermin med jamne mellomrom.  

Arbeids- og læringsmiljøet skal vera inkluderande, og det skal vera stor takhøgde for ulike synspunkt. Utanlandske tilsette får tilbod om norskopplæring, noko som gjev dei gode føresetnader for å bli godt integrerte og inkluderte i alle sider ved instituttet si verksemd.   

Mellombels tilsette (stipendiatar) skal verta godt integrerte i instituttet som eit akademisk fellesskap ved at dei blir invitert inn i  både forskargruppe og faggruppe.  

Instituttet skal ha best mogleg vilkår for å utføre kjerneverksemda på ny campus. Vi skal ha hensiktsmessige arbeidsplassar som legg til rette for god kontakt mellom tilsette og mellom tilsette og studentar. Vi skal ha gode, velfungerande spesialareal og ein utstyrspark som gjer at vi kan ha bransjestandard på dei praktiske/kunstnariske utdanningane våre. Det skal sørgast for at kvaliteten på undervisningsrom og utstyr på Dragvoll blir opprettheldt i tida før flyttinga.

Ambisjon 2 

IKM skal vera pådrivar for kunnskapsbasert og berekraftig samfunnsutvikling 

IKM har eit særleg ansvar for forsking på og formidling av visuelle kulturelle uttrykk, samt film- og scenekunst. Kulturen er viktig for utvikling av individ og fellesskap, og forskinga ved IKM skal gje viktige bidrag  for forståinga av ulike kulturelle uttrykk si betydning for demokrati, inkludering og medborgarskap.  

Våre fag er også viktige som beredskapsdisiplinar. Dei gjev innsikt i samfunnsutfordringar og bidreg med eit metaperspektiv på all kunnskapsproduksjon. Det gjeld alt som vert skapt, formidla og/eller lagra i eitt eller anna medium.  

IKM skal søke tverrfaglege samarbeid som kan bidra til å løyse viktige samfunnsutfordringar. Vi skal vera oppsøkande i forhold til potensielle samarbeidspartnarar, og skal i samarbeid med relevante samfunnsaktørar utvikle EVU-kurs som skal bidra til etterspurt kompetanse.  

Ambisjon 3

IKM skal bidra til at NTNU er eit leiande internasjonalt universitet 

IKM har ein særeigen profil gjennom kombinasjonen av teoretisk og kunstnarisk utdanning, og vitskapleg og kunstnarisk forsking. Instituttet har i dag fleire nasjonalt leiande studie- og forskingsmiljø, og fleire fagmiljø med ein sterk internasjonal posisjon. Vi skal i framtida jobbe for å styrke den internasjonale posisjonen til våre fag.

Tilsette ved IKM skal samarbeide med dei beste fagmiljøa nasjonalt og internasjonalt. Fagmiljøa på IKM skal vera attraktive samarbeidspartnarar for leiande internasjonale forskingsmiljø som skal etablere konsortium for større EU prosjekt.

Instituttet skal utnytte moglegheita som tverrfagleg samarbeid gir for å skape studieprogram med internasjonal kvalitet som rekrutterer godt. Instituttet skal gje god og attraktiv utdanning i dei studieprogramma vi har sjølve og i samarbeid med andre institutt. Undervisninga skal vera tett knytt til forskingsaktiviteten ved instituttet.

Forskinga og det kunstnariske utviklingsarbeidet ved instituttet er organisert rundt forskargruppe, der master- og phd-studentar også skal delta aktivt. Ein ikkje ubetydeleg del av forskinga skal vera eksternfinansiert, eks. gjennom NFR eller EU.

Kunstnarisk forsking/utviklingsarbeid ved instituttet byggjer på den nasjonale standarden for dette arbeidet, og skal vera godt samanvevd/integrert med den vitskaplege forskinga ved instituttet.

IKM skal vera med på å prege NTNU ved flytting til ny campus. Våre visuelle og kunstnariske fag belyser korleis idear og verdiar blir skapt og mobilisert, og er difor ein viktig del av breiddeuniversitetet NTNU. Vår utdanning og forsking skal vera synleg på ny campus, både visuelt i arkitekturen og gjennom den faglege og kunstnariske aktiviteten.