Ringve botaniske hage er ei levande plantesamling, brukt til forsking, undervising og ivaretaking av truga artar.  Hagen formidlar også kunnskap om botanisk mangfald og om verdien plantene har for menneske og dyr. Plantene i Ringve botaniske hage er derfor både ei utstilling og ei vitskapleg samling. 

Hageanlegget er på 130 dekar og ligg storslått til på ei høgde på Ladehalvøya, 3 km aust for Trondheim sentrum. Midt i hagen ligg garden Ringve med historie attende til 1500-talet. Fram til etableringa av Ringve museum i 1952 var dette gjennom fleire hundreår ein lystgard for velståande familiar i Trondheim.  Ringve museum er no Noregs nasjonalmuseum for musikk og musikkinstrument.  

Ringve botaniske hage vart oppretta som universitetshage i 1973 og er driven av NTNU Vitskapsmuseet. Hagen er bygd opp som ein klassisk universitetshage, der dei ulike plantesamlingane demonstrerer ulike sider av botanikken, til dømes plantegeografi, systematikk og hagehistorie.  

Med botanisk hage og musikkmuseet er Ringve ein viktig turistattraksjon i Trondheim. Den storslegne plasseringa, det store området og dei mange aktivitetane som går føre seg gjennom heile året, gjer også Ringve til eit viktig rekreasjonsområde for folk er busette i byen.