Sterk kritikk av PBL på Bygg
Tradisjonell eksamen og dårleg effekt av gruppearbeid
kan slå føtene under den prestisjefylte
undervisingsforma Prosjektbaserte læring (PBL) ved fakultet
for bygg- og miljøteknikk.
PBL ved fakultet for bygg- og miljøteknikk har eit stort
betringspotensiale, viser ei ny NTNU-undersøking av
PBL-undervisinga ved fakultetet som starta opp hausten 1997.
Undersøkinga, som er gjort blant fyrsteårsstudentar
ved fakultet for bygg- og miljøteknikk vårsemesteret
1998, viser at 1) mykje av tida i studentgruppene går med
til privatsamtalar; 2) det finst ingen dagsorden og ingen
framdriftsplan; 3) styringa av arbeidsprosessen er uklar; 4)
arbeidet er ujamnt fordelt, og 5) studentar møter opp utan å
vere budd.
Systemet sviktar
Det er Markus Sorge ved Seksjon for universitetspedagogikk (PLU)
som har stått bak stått bak sprøjeundersøkinga
som omfattar over 135 1., 2. og 3. semestersstudentar ved
fakultetet. Svarprosenten var 60. Ei tilsvarande undersøking
gjort for hausten 1998 stadfestar eller forsterkar tendensane.
Markus Sorge arbeider tett opp mot fakultet for bygg- og miljøteknikk
som pedagogisk rådgivar. Han hevdar at det ikkje er manglane
vilje hjå studentar og tilsette det står på.
- Det er systemet som inneheld nokre fallgruver: Studentane og
dei tilsette må bli kursa i prosjektarbeid før dei
blir kasta ut i det. Det trengst større omstillingsevne både
hjå studentar og hjå vitskapleg tilsette på Bygg
for å få PBL til å fungera, hevdar Sorge.
Det største problemet med PBL-gruppearbeidet på
Bygg - slik Sorge ser det - er at studentane i for liten grad
overfører kunnskap til kvarandre.
- Målet med gruppene har vore at kvar student i gruppa
skal blir «spesialist» på sitt felt, det viser
seg at studentane jobbar med sin eigen del av oppgåva for så
å sy dette saman til den endelege prosjektrapporten, seier
Sorge.
Gamaldags
- Undervisingsleiinga på Bygg er for opphengt i det gamle.
Det er som å hoppa over ein bekk. Satsar du ikkje for fullt,
ramlar du nedi med begge føtene. Det er det faktultet for
bygg- og miljøteknikk har gjort. Dei har ikkje teke steget
fullt ut, seier Dan Yngve Jacobsen, som har skrive doktorgrad om
PBL, og som har vore éin av forfattarane bak det so kalla
«Digitalis-prosjektet». Digitalis er eit samlenamn på
evalueringa av fleire prosjekt ved NTNU og HiST som har integrert
IKT i undervisinga. Ein hovuddel av denne rapporten evaluerer PBL
på Bygg. Evalueringa, som er basert på interne
evalueringsrapportar, møter i referansegruppe, intervju med
studentar og på diverse tallmateriale, viser PBL ikkje har ført
til dårlegare resultat i det faget metoden er nytta.
- Studentane er rasjonelle; dei vil gjera det godt på
eksamen og legg opp eigne arbeidsmåtar etter det. Dessverre
har ikkje eksamen endra seg i same grad som undervisningsforma,
seier Dan Yngve Jacobsen og illustrerer:
- I fyrste semester skal studentane gjennomføra eit
IT-prosjekt som skal likna mest mogleg på den måten
dei seinare kjem til å bruka IT-reiskap på i
arbeidslivet. Dette tek også sjølve prosjektet omsyn
til. Men på eksamen i det same IT-faget blir det berre spurt
etter teori og reine tekniske kunnskapar. Ein kan i høgste
grad seia at det framleis er for lause koplingar mellom eksamen og
PBL, seier Jacobsen, som saknar ei meir heilskapleg pedagogisk
tenking frå fakultetet si side.
Eitt av problema som Jacobsen peikar på er den høge
legitimitetsfaktoren studentane har:
- Studentane er i stort sett positive til undervisningsopplegget
- relevans for praksis synest å vera viktig. Studentane set
også pris på studentaktive arbeidsformer. Men det som
er uheldig er at når studentane er nøgde, tek leiinga
dette som eit klart signal at undervisinga fungerer - utan å
sjå på det vidare potensialet i arbeidsmåten.
Dette gjeld både for medisinstudiet og PBL på Bygg,
avsluttar Jacobsen.
TEKST: NORALV PEDERSEN
Les også: Eit stykkje att å gå
Les også: Vil ha ny eksamensform |