- NTNU treng klarare forskingsstrategi
Forskingsadministratorane ved NTNU er spreidd på tre avdelinga
etter nedlegginga av forskingsavdelingar (FUF). NTNU risikerer å
stå fram som ein rotete organisasjon med tilfeldige søknadsprosedyrar,
og kan tapa i kampen forskingsmidlar.
|
|
Dagens forskningsstrategi ved NTNU er for generell og
må vidareutviklast, seier professor Per Morten Schiefloe. |
|
Avdeling for fagleg utvikling og forsking (FUF) vart 1. april 1999
lagt ned, som eit resultat av Orgut. FUF vart oppretta i 1996 og skulle
mellom anna støtta opp under større forskingsinitiativ mot
institusjonar som løyver pengar til forsking - som til dømes
Norges forskningsråd, EU og næringslivet. Med trange budsjett
står NTNU no føre store utfordringar med mellom anna å
skaffa ekstern alternativ finansiering. Direktør Kåre Rommetveit
ved Universitetet i Bergen sa nyleg at arbeidet som forskningsadministratorane
gjør, må legitimerast betre. Jacob Hygen, den tidlegare forskingsdirektøren
ved NTNU, er samd i dette.
Store utfordingar
Hygen vil ikkje uttala seg om interne forhold ved NTNU. Det er likevel
kjent at Hygen tidlegare har uttrykt at det kan bli vanskelegare for NTNU
å få finansiert store, tverrfaglege, strategiske forskingsprogram
i til dømes Norges forskningsråd - no når forskingsadministrasjonen
ved NTNU vert fordelt på tre ulike avdelingar etter nedlegginga av
FUF: Informasjonsavdelinga har ansvar for kontakten med næringslivet,
Studieavdelinga for EU og Plan- og utredningsgruppa for Norges forskningsråd.
Hygen har tidlegare også påpeikt at det er heilt naudsynt
med ein samla og overordna forskingsadministrativ regi ved NTNU, tett kopla
opp til universitetet si faglege leiing. Den tidlegare forskingsdirektrøren
er også samd med Kåre Rommetveit i at forskingsadministrasjonen
må ha høg legitimitet frå universitetsleiinga. At forskarane
har ein motvilje mot byråkratisering, er kjent. Rommetveit har derfor
påpeikt at den valde leiinga må stå bak administrasjonen
og synleggjera nytten av det arbeidet som blir gjort.
Saknar forskingsprofil
Professor Per Morten Schiefloe, institutt for sosiologi og statsvitskap,
saknar ein klar operasjonalisert forskingsstrategi for forskingsadministrasjon
ved NTNU.
- Dagens strategi er for generell, og må vidareutviklast og meislast
klarare ut. NTNU treng ein profesjonell administrasjon som kan støtta
opp under alle delar av forskingsprosjekta, seier Schiefloe, og viser til
kor viktig det er at universitetsleiinga må støtta opp om
det arbeidet som forskingsadministratorar gjer. Om den forskiningsadministrative
støtta er lokalisert sentralt eller lokalt i organisasjonen, meiner
Schiefloe er mindre viktig:
- Det som er avgjerande er at ein ved NTNU får til eit produktivt
samspel mellom forskar og forskningsadministrator.
Legitimering
- Er det eit heldig signal å leggja ned FUF når ein samstundes
vil satsa på forskingsadministrasjon, universtitetsdirektør
ved NTNU, Vigdis Moe Skarstein?
- Eg ser ikkje at nedlegginga av FUF har svekka forskingsadministrasjonen
ved NTNU. Etter Orgut har forskingsadministrasjonen flytta lokalt. Dei
faglege miljøa har fått større ansvar. Samstundes blir
dei store tverrfaglege og strategiske forskingsprosjekta er knytta opp
mot rektor, der det er to planleggjarar som har ansvaret for denne koordineringa.
- Gjer universitetsleiinga nok for å legitimera forskingsadministrasjonen
ved NTNU sitt arbeid?
- Ja, det tykkjer eg. Det finst like mange måtar å organisera
ein administrasjon på som det finst universtitet. Det viktige er
å halda fokus på den strategiske tenkinga.
- Bidreg Orgut - med sitt klare skilje mellom administrasjon på
den eine sida og styring og leiing på den andre - til at samarbeidet
mellom forskar og administrasjonen blir endå vanskelegare?
- Nei, skilje går meir på rolleavklaring. Dette betyr ikkje
at til dømes forskarar og administrasjon skal arbeida kvar for seg.
Det er ei viktig forutsetning at dei to gruppene skal samarbeida.
TEKST:NORALV PEDERSEN
|