Klokkeklang i tusen år
Når vi går inn i eit nytt millennium, vil klokkeklangen
tale til menneska om det tusenåret vi legg attom oss.
Kyrkjeklokkene i Nidarosdomen har vore ein viktig del
av livet sidan tidleg mellomalder. Til tider har dei vore så viktige
at dei påverka og forandra døgnrytmen til folket.
Heilt sidan Olav Tryggvassons tid har kyrkjeklokkene i Trondheim følgd
folk gjennom livet, i kvardag og helg, frå fødsel til død.
I dag druknar nok klokkeringinga mange stader i trafikkstøy og
motordur. På ein stille søndags føremiddag kan vi likevel
ane noko av den kraft som ligg i ringinga frå dei mange kyrkjetårn,
med Domen som den mektige bassrøysta. Og sogeskrivarane i mellomalderen
gir mange døme på at klangen frå kyrkjeklokker var både
meiningsberande og sto fram som eit viktig element i lydlandskapet.
Klokkeklangen må heilt frå første stund ha gjort
eit sterkt inntrykk på menneska. Den skilte seg ut både i klangfarge
og lydnivå frå dei fleste andre lydar. Snorre Sturlason nemner
fleire stader klokkeringing som eit avgjerande og handlingsskapande element
i kritiske situasjonar. I kongesogene blir det òg fortalt om klokkeringing
for å heidre kongen når han kom til byen etter å ha vunne
viktige slag: da vart det ringt i kyrkjene og prestane gjekk den sigerrike
fyrsten til møtes i høgtideleg prosesjon. I samband med årtidhald
- sjelemesser for rikfolk som hadde gitt kyrkja av sin rikdom - heitte
det gjerne at dei skulle ringe i så mange kyrkjer som råd (og
naturlegvis slik at det sto i rimeleg høve til gåva).
Alle kunne ha hjelp av klokkeringing, til dømes for å orientere
seg på fjorden i tjukk skodde. Trondheim hadde ei byklokke i det
høge tårnet på Margaretakyrkja, ytst i kaupangen. Ho
vart kalla Bøjarbot - «byhjelp» - og er nemnt fleire
stader i den norrøne litteraturen.
Blant dei viktigaste funksjonane til kyrkjeklokkene var at dei regulerte
livs-, års- og døgnrytmen for alt folk i kaupangen. Dette
var så grunnleggande at det til og med er nedfelt i lovverket. Ringinga
ved dei ulike tidebønnene greip direkte inn i døgnrytmen,
på meir enn eitt vis.
I Bjarkøyretten, bylova for Trondheim, blir fleire stader klokkeringing
nemnt som tidsreferanse. Det gjeld t.d. sverjing: «Den mann som eid
skal sverja, skal komma med vitna sine åt Peterskyrkja når
det vert ringt til midmorgonmesse ved Kristkyrkja, og ha svore eiden før
det ringjer til undorn ved Kristkyrkja.» Her var det tida mellom
ringing til to tidebønner, midmorgonmesse og undorn (tredje timen,
dvs. klokka 9), som skulle nyttast. Somtid vart sjølve tidebønna
nytta som tidsreferanse, og sidan ikkje alle kunne vera til stades ved
dei mange tidebønnene, var det vel helst klokkeringinga folk flest
måtte halde seg til. Om ein mann var påført lekamsskade
«før aftansong i kaupangen» kunne han krevje at bymennene
vart kalla saman til møte omgåande, men dersom han vart «påført
skade etter aftansong» måtte han vente til neste dag med å
få brotsverket opp for bymøtet.
Det var klare reglar for kva ein kunne gjera på søndagar,
og helga vart ringt inn med kyrkjeklokkene. Huder kunne ein ikkje henge
opp i helga - «Men alle huder som heng ute når det ringjer
til helg, dei skal hanga i helga utan straff».
I den gamle Frostatingslova er det krav om at bøndene skulle
bygge kyrkjer i kvart fylke. Men kyrkja skulle òg ha utstyr: «Klokke
skal alle menn i fylket vidare kjøpa til kyrkja si for tolv øyrar.
Men om ho ikkje er kjøpt innan tolv månader, er dei skuldige
tre merker i straff til biskopen. Og om det ikkje vert gjort, eller ein
mann dreg seg unna, skal det bøtast tre øyrar til biskopen.»
Klokkeringing var òg nytta i samband med tinget: «Og den
presten som rår for lovboka, han skal ringja med storklokka når
han vil ganga til tings med boka, og den klokka skal ikkje ringja til anna
medan tinget stend på». Dette var ein ny praksis. I saga-litteraturen
heiter det at folk vart kalla til tings med lurblåster. Luren, som
var brukt til alle slags tingsamlingar i vikingtida, vart avløyst
av kyrkjeklokkene i kristen tid!
Denne overgangen har Snorre skildra på ein tankevekkande måte
i soga om Magnus den Gode. Før slaget på Lyrskogshede (vest
for Schleswig) i 1043 var kongen «fælt hugsjuk», og han
sovna og drøymde at han møtte far sin, den heilage kong Olav.
Helgenkongen trøysta sonen sin og sa «Eg skal følgje
deg i dette slaget. Gå til strid mot vendene når de høyrer
luren min.» Da kongen vakna, fortalde han om draumen. Det tok til
«å lysne av dag. Da høyrde heile folket ein klokkeklang
oppe i lufta, og dei av mennene til kong Magnus som hadde vore i Nidaros,
tykte det var liksom dei ringde med klokka Glad; den klokka hadde kong
Olav gjeve til Klemenskyrkja i Kaupangen.»
Jamvel om denne skildringa har legendekarakter, peiker ho på ei
gjennomgripande og grunnleggande endring i kulturell praksis: at kyrkjeklokka
var i ferd med å overta lurens rolle som kommunikasjonsmiddel - i
krig som i fred. Riktignok heldt vikingarven seg fram til 1200-talet med
bruk av lur, om vi skal tru sogeskrivarane. Men bruken av kyrkjeklokker,
vel etablert på 1000-talet, skulle bli det varande kulturelle elementet
i lydlandskapet fram til moderne tid.
Klokkeklangen gav òg inspirasjon til musikklivet. På langleiken,
det mest tradisjonsrike av dei norske folkeinstrumenta, er det eit eige
repertoar - dei såkalla klokkelåtane - som skal vera inspirert
av klokkeringing. Somme av desse har jamvel namn etter kyrkjeklokker. SanktThomas-klokkelåten
er såleis oppkalla etter klokkene i Thomas-kyrkja som sto på
Fillefjell, og desse har namn etter erkebiskopen av Canterbury, Thomas
Becket, som vart helgenkåra i 1170. Den monotone klangen i SanktThomas-klokkelåten
minner om klokkeklang og er såleis i godt samsvar med det opphavet
folketradisjonen har tillagt desse vedkjømelege tonestykka.
Klokkeklangen har halde seg gjennom heile tusenåret. Han har følgd
generasjonane og varsla om sorg og glede, krig og fred og brannkatastrofar.
Når behovet meldte seg, ringte vektarane med kyrkjeklokkene, og dei
var eit fast innslag i bybildet frå Magnus Lagabøters tid
til 1800-talet.
Det er først i vår tid at dei fysisk nærverande og
sansbare lydbølgene frå kyrkjeklokker har måtta vike
plassen for elektromagnetiske bølgjer og etermedia, som langt meir
effektivt og presist kan spreie viktige meldingar til alle i samfunnet.
Men framleis kling kyrkjeklokkene «frå tusund tårn»
ved høgtider og livets viktige milepålar. Og framleis gir
det meining å vise til Adam av Bremens karakteristikk av «Trondheimnis»
på 1000-talet som byen med dei mange kyrkjer. Når kyrkjeklokkene
i Trondheim ringer inn det nye året, vil dei i dobbel meining fylle
byen og menneska med ein tusenårsklang.
OLA KAI LEDANG
FOTO: KENNETH AAR
|