Eit svakt hjarte – samskaping mellom kunst, ungdom og psykisk helse

Forskingsprosjekt - Institutt for kunst- og medievitskap (2023-2027)

Eit svakt hjarte – samskaping mellom kunst, ungdom og psykisk helse

Paneldebatt med medlemmer av et svakt hjerte. Foto. — Foto: Brage Eikanger Hagen

Om prosjektet

Eit svakt hjarte er eit kunstnarisk forskingsprosjekt ved Institutt for kunst- og medievitskap (NTNU) leidd av førsteamanuensis og regissør Lene Helland Rønningen. Prosjektet utforskar korleis klassisk litteratur kan aktiverast og transformerast når han møter unges eigne erfaringar, språk og kunstnariske uttrykk. Gjennom samskapande prosessar undersøkjer me korleis estetiske uttrykk kan opna for nye samtalar om psykisk helse, motstandskraft og relasjonar.

Prosjektet utviklar både kunstnariske produkt (verkstader, installasjonar og ei ny sceneframsyning) og forsking på korleis medskaping i kunsten kan påverka unge deltakarar, og kva betydning slike prosessar kan ha i eit helsefremjande perspektiv.

Tre samskapande verkstader

Prosjektet byggjer på, og vidareutviklar ein pilotverkstad, støtta av NTNU såkornmidlar (2025). I hovudprosjektet blir tre utforskande verkstader gjennomførte der ungdom er medskaparar av det kunstnariske materialet:

Hoveddel 2/3

Verkstad 1 - Tekst og drama

Verkstad 1 – Tekst og drama

(vidareføring av forprosjektet, i samarbeid med Propellen Teater og Cissi Klein vgs) Ungdom skriv, dramatiserer og utforskar temaa frå Eit svakt hjarte. Tekstmaterialet dannar grunnlag for ny scenetekst.

Verkstad 2 – Rap, tekst og lyd

(i samarbeid med Kultursenteret ISAK) Ungdom utviklar rapptekstar, rytmar og lydfragment saman med rappar og produsent Johnny Engdal Silseth (Jaa9), norskdidaktiker Even Diesen og forfattar Marte Huke og det kunstpedagogiske teamet for prosjektet.

Verkstad 3 – Papir, lys og visuelle uttrykk

(i samarbeid med Kunsthall Trondheim) Ungdom skaper romlege og visuelle uttrykk gjennom papir og lys. Blir lide og blir utvikla av scenograf Berit Haltvik With, lysdesignarar Kevin Ulstad og Nils Christian Boberg og resten av det kunstpedagogiske teamet for prosjektet. Verkstaden blir avslutta med ei utstilling og ein offentleg panelsamtale, kuratert av dramaturg Aimee Kaspersen.

Hoveddel 3/3

Forestilling

Det kunstnariske utviklingsarbeidet som går føre seg i verkstadene er ein del av ein stor samskapande prosess der me forskar på korleis ulike typar ungdom får bidra med innspela sine om psykisk helse i dag gjennom ulike kunstnariske medium. På denne måten samlar me også materiale frå ungdommen; dei bidreg med både tekstfragment, tematiske spor, musikalske bilete og visuell utforming. Til saman vil dette bli avgjerande innspel i ein prosess med skapande og utøvande kunstnarar der me utviklar konseptet, sceneteksten og visuelle utforminga til framsyninga. Framsyninga har premiera våren 2027.

Kunst, helse og forsking

Prosjektet kombinerer kunstnariske metodar med helsefaglege perspektiv og pedagogisk forsking. Eit tverrfagleg forskarteam ved NTNU følgjer prosessen:

Charlotte Fiskum (førsteamanuensis i klinisk samfunnspsykologi)
Lene Helland Rønningen (førsteamanuensis i drama og teater)
Even Diesen (førsteamanuensis i norskdidaktikk)

Forskarane undersøkjer korleis samskaping kan påverka opplevinga av fellesskap, eigenmeistring og psykisk helse blant ungdom, og korleis kunstnariske prosessar kan utvikla nye måtar å snakka om press, sårbarheit og vennskap.

I tillegg undersøkjer prosjektet korleis samskapingsprosessar der ungdom deltek i alle delar av utviklinga – frå idéarbeid og tekst til lyd, scenografi og ferdig framsyning – kan bidra til å skapa ny dramatikk og eit scenisk uttrykk som speglar unges eigne erfaringar.

Prosjektet vil også knyta til seg aktuelle masterstudentar innanfor fleire fagområde.

Gjennom prosjektperioden blir det arrangert paneldebattar og opne samtalar som samlar ungdom, kunstnarar, forskarar og fagpersonar.