Den tidlegare NTNU-studenten Martin Ingebrigtsen har nyleg gjendikta ei samling av den amerikanske lyrikaren Nathaniel Farrel: Nykommar (Samlaget, 2018). Boka er ein del av Samlaget si gjendiktingsserie av ny poesi.
«Nykommar er den namnlause soldatens vitnesbyrd frå eit omskifteleg, framandt landskap. Boka viser oss korleis ein ung manns opplevingar i krig lèt seg overstyre av tankar og minne om heimplassen, familien og kjærasten. I eit fragmentarisk langdikt som er delvis historisk fiksjon og delvis eit naturdikt, trekkjer Farrell inn impulsar frå klassisk Americana og Southern Gothic. Det er USAs historie om seg sjølv som dannar bakteppet for denne følsame utforskinga av kva det vil seie å vere ein ung mann, langt heimanfrå, med ei usikker framtid».
Martin Ingebrigtsen har ei mastergrad i allmenn litteraturvitskap frå dåverande Institutt for nordistikk og litteraturvitskap (no Institutt for språk og litteratur) i 2012. Han er no forfattar, omsettar og formidlingskonsulent hos Forfattersentrum Midt-Noreg.
