|
«Jeg synes det er oppsiktsvekkende hvordan Kari Moxnes stempler
kristne lærere. Etter dette er hun ubrukelig som familiesosiolog,
sier statsråd Valgerd Svarstad Haugland.»
Denne kraftsalven sto å lesa i Dagbladet si søndagsutgåve
7. november. Høvet var eit lengre intervju samme avis hadde
med NTNU-sosiologen dagen i forvegen, kor Moxnes uttrykker sterk skepsis
mot kristne ekteskapskuler.
Dette er tredje gongen i løpet av eit par månader at ein
statsråd eller statssekretær frå |
Bondevik-regjeringa har hamna i offentleg polemikk med en akademikar tilknytt
NTNU. Først var det Svarstad Haugland
sin tidlegare statssekretær Odd Anders With, som kom i clinch
med professor Kari Melby. Deretter var det helsestatsråd Dagfinn
Høybråten og professor Sturla Eik-Nes som tråkka kvarandre
på tærne.
Og nå statsråd Svarstad Haugland og førsteamanuensis
Kari Moxnes.
- Eg uttaler meg ikkje om Kari Moxnes som forskar, men på dei
subjektive innspela ho har kome med. Eg reagerer når ho med referanse
til kristne lærarar i vidaregåande skulen, seier at «hvis
opplegget er å bringe fortiden tilbake ved å legge vekten på
forpliktelser, løfter og slike ting, så tror jeg ikke på
det» ? så synest eg dette er ein temmeleg drøy påstand.
Det er svært viktig å læra den komande generasjon å
ta vare på kvarandre i parforhold. Dersom vi ikkje er opptekne av
forpliktingar i parforhold, kva skal ein då vera oppteken av? Dersom
ho meiner det som står her, er eg djupt ueinig med ho. Då trekker
eg i tvil hennar evner som familiesosiolog. Men eg har ikkje gjeve henne
karakter som forskar.
- Meiner du Moxnes blandar saman private meiningar med si rolle som
fagperson?
- Ja. Det ho seier her har ingen ting med forsking å gjera.
- Men er det ikkje bra at akademikarar tør å halda ein
høg profil i samfunnsdebatten? Dei blir jo oftast skulda for det
motsette?
- Jo, men då må dei vera budde på at ein reagerer.
Det hadde vore interessant å teke ein fagleg diskusjon med ho om
desse tinga. Kari Moxnes har heilt klart mykje kunnskap om dette, det er
jo feltet hennar. Men dei konklusjonane ho trekker, er hennar eigne, og
dei er subjektive. Då må ho forventa at folk tek til motmæle.
- Vil det ho sa til Dagbladet føra til at du får mindre
tiltru til forsking som ber hennar signatur?
- På ingen måte. Ho var nyleg med på å avslutta
eit forskingsprogram om barn og unge som ho har vore ein aktiv bidragsytar
til. Dette er forsking som det er verdfullt for meg som minister å
få inn.
Statsråden meiner Moxnes har kome med angrep som er kritikkverdige
på fleire måtar.
- Kari Moxnes går til frontalangrep på kristne menneske,
i tilhøve til undervisning når det gjeld ekteskapskuler. Det
er den andre sida ved innspelet hennar, kor ho stempla ei heil gruppe lærarar
som udugelege innanføre dette feltet. Det er ei svært grov
skulding ho kjem med ? som eg reagerer på både som kristen
og som lærar.
Statsråden meiner at ein av dei store utfordringane i samfunnet
er dei alt for mange parforholda som går i oppløysing. Difor
må politikarane gjera meir for å legga til rette for at tala
på samlivsbrot skal gå ned.
- Då er det faktisk ganske viktig at ein føler visse forpliktingar
for kvarandre. Når ein har gått inn i eit ekteskap så
har ein lova kvarandre noko. Dette løftet må meine noko meir
enn at det berre skal vare til det dukkar opp ein annan.
- Du er ikkje den første KrF-statsråden som har kome
i strid med ein akademikar i universitetsmiljøet i Trondheim: Først
var det statssekretæren din og sosiolog Kari Melby, så Høybråten
og Eik-Nes. Viser dette at ideologi er viktigare for politikarar i ditt
parti og at dei difor ikkje greier å la vera å blanda dykk
inn i kva forskarane driv med?
- Eg håpar inderleg politikarar også frå andre parti
tek med seg livssynet og ideologien når dei skal taka stilling til
etiske spørsmål som har med forsking å gjera. For å
ta saka med Høybråten og ultralyd, så er det jo berre
Framstegspartiet som ikkje har støtta Høybråten. Representantar
frå alle andre parti har gjeve statsråden støtte når
det gjeld striden hans med Sturla Eik-Nes. Eg vil minna om ein ting: Vi
politikarar vert ofte skulda for at vi lar forskinga få ha heile
styringa, og at vi diltar etter med lover og reglar. Her har altså
Dagfinn Høybråten ytra ønske om at ein skal ha ein
etisk debatt før ein set i gong med forskinga. Det er vår
plikt som politikarar å drøfta dei etiske sidene ved forsking.
- Men likevel: Er det tilfeldig at det er KrF-statsrådar eller
statssekretærar som har hamna i desse konfliktane?
- Det er nokon av oss som er spesielt engasjerte i felta våre.
Eg synest ikkje dette intervjuet med Kari Moxnes er med på å
understreka hennar faglege kunne.
- Meiner du politikarane må vera meir aktive når det
gjeld å halda forskarane i øyrene?
- Forskarane skal ikkje styrast. Dei skal forska, og produsere resultat.
Så har vi sjølvsagt eit lovverk som skal setta grenser for
kva dei kan forska på. Bioteknologilova er eit slikt lovverk. Den
lova skal opp til revidering i nær framtid, seier statsråd
Valgerd Svarstad Haugland.
TORE OKSHOLEN
FOTO: SCANPIX
|