Replikk
Rune Skarstein
Kvar går Universitetsavisa?
I siste nr. av Universitetsavisa (UA) er det eit interessant
intervju med universitetsdirektør Vigdis Moe Skarstein om innstillinga
frå Ytringsfrihetskommisjonen som ho var nestleiar for. I intervjuet
framstår Moe Skarstein som ein sterk talsperson for større
ytringsfridom. Ho legg stor vekt på at det skal vere redaktøren
og ikkje eigarane som bestemmer kva som skal stå i ei avis. Saman
med eit mindretal i kommisjonen meiner ho til og med at redaksjonell uavhengighet
bør lovfestast.
Men på direkte spørsmål om UA sin redaksjonelle
status blir ho meir vag. Først hevdar ho at ”Prinsippet om redaksjonell
frihet praktiseres for UA i dag. UA har også sin formålsparagraf,
slik dagsaviser har det – men ut over det styrer ikke universitetsledelsen
hva som står i avisa.” Men ho legg til at det kommisjonen seier om
redaksjonell fridom, ”i første rekke” gjeld dagspressa, og at dette
”blir litt annerledes enn når det gjelder bedriftsaviser,
informasjonsaviser som sådan, som har litt andre formålsparagrafer.
… Om vi tar dette som en parallell til NTNU og Universitetsavisa, så
har NTNU den doble rollen at universitetet på den ene siden legger
til rette for å finansiere en avis som skal blidra til offentlig
debatt ? samtidig som at avisa også skal bidra med informasjon om
NTNU som sådan.”
Meiner ho med dette at UA er, eller skal vere, ei ”bedriftsavis”
eller ei ”informasjonsavis” for universitetsleiinga? Det vi kan observere
er at det som står der av ”informasjon om NTNU som sådan” i
aukande grad er universitetsleiinga sin informasjon og ein stadig repetisjon
av deira ”visjonar”. Det hender etter kvart mykje på NTNU som ikkje
blir nemnd med eit ord i UA, og det er grunn til å tru at dette er
i samsvar med universitetsleiinga sin informasjonspolitikk.
UA vart stifta i 1991, som landets første – og
einaste – uavhengige universitetsavis. Slik var det ikkje lenge. I 1996
avgjorde Kollegiet at avisa skulle bli underlagd administrasjonen. Kollegiet
laga eit umogleg vedtak: Avisa skal redigerast under Redaktørplakaten
– men samstundes skal informasjonsdirektøren vere ansvarleg redaktør.
Med dette fekk NTNU ei avis som er fri i namnet, men ikkje i gagnet.
Dette sa Einar Myrenget, redaktør gjennom det
meste av avisa si snart ti år lange historie, til Under Dusken for
eit halvår sidan: ”Jeg tror nok at begrepet selvjustis har vært
sterkere i redaksjonen enn vi har likt å innrømme.” Han sa
vidare at avisa har vore einsidig oppteken av kva leiinga ved NTNU seier
og gjer.
Det er sikkert stor semje om at NTNU treng ein pressesekretær
eller informasjonsdirektør som kan hjelpe universitetsleiinga å
forklare kva dei eigentleg meiner. Den som er i tvil om at slik hjelp trengst,
rår eg til å lese spalten ”Lederen har ordet” i siste nummer
av UA. Men dersom NTNU treng berre eit informasjonsorgan for leiinga, vil
eg hevde at det er i meste laget med ei avis. Kollegiet bør derfor
ta konsekvensen av sitt vedtak frå 1997 om at ”Pressens ’Redaktørplakat’
og ’Vær varsom plakat’ skal legges til grunn for arbeidet i UA”.
Det må innebere at avisa sin redaksjon blir organisatorisk skild
frå NTNU sin informasjonsdirektør.
I Under Duskens intervju med Einar Myrenget får
vi også vite at UA sitt redaksjonsråd er blitt nedlagt i strid
med Kollegiet sine Retningslinjer. Dette rådet bør snarast
bli gjenoppliva dersom UA skal vere ”et organ for kommunikasjon, meningsutveksling
og fri debatt”, som det så vakkert heiter i Kollegiet sine Retningslinjer.
|