Kunsten å byggja eit universitet
Slit. Bygningsarbeidarane ber mursteinen
i korger på ryggen
til taket på dei nye universitetsbygningane,
fire etasjar over bakken. Det er tungt arbeid å byggja universitet
utan maskinar.
Mangfald. Frå naturen si side er
Nepal mangfaldig, der landet strekkjer seg frå subtropisk lågland
og opp til dei høgaste fjelltoppane i verda. Over 30 språk
og endå fleire etniske grupper avspeglar dette mangfaldet.
Men økonomisk er Nepal fattig, avhengig
av pengar og ekspertar utanfrå.
Samarbeid. NTNU hjelper eit ungt universitet
i Nepal. Ein rammeavtale for samarbeid med Kathmandu University er nettopp
underteikna, og no er det klart for utveksling av studentar og lærarar.
Vil Norad betala, skal NTNU-lærarar også undervisa mastergradsstudentar
i ingeniørfag i Nepal.
- Frå vår side er dette utviklingshjelp
og fagleg idealisme, men også vi kan få noko att for samarbeidet,
seier fakultetsdirektør Åge Søsveen ved Fakultet for
maskinteknikk.
Utvikling gjennom utdanning
KATHMANDU - Vi veit at forskarar frå
mange land arbeider i Nepal, men vi har sjeldan kontakt med dei. Målet
vårt er å byggja fagmiljø som er gode nok til at utlendingar
vil samarbeida med oss. Då kan ein del av kunnskapen bli att her.
Professor Surendra Raj Kafle er dekanus ved School
of Science ved Kathmandu University. Der har han dei siste åra vore
med på å byggja opp eit universitetsmiljø frå
grunnen av. Med doktorgrad frå eit indisk universitet og tre post.doc.-år
i USA veit han godt at hans eige universitet har langt att før det
kan måla seg med dei fremste utanlandske. Likevel treng universitet
også i Nepal forskingsaktivitet på høgt nivå for
å kunna tilby god undervisning.
Kathmandu University vart formelt oppretta i 1991.
I -94 starta dei første studentane på fireårige bachelor-program
i ingeniørfag og naturfag, og det første kullet vart uteksaminert
i 1998. I dag kan universitetet også tilby farmasi-utdanning, medisin
og nokre pedagogikk-kurs. I tillegg har det formelt ansvar for skular som
tilbyr utdanning i mellom anna musikk og administrative fag.
Risåkrar og internett
Universitetet ligg vakkert til i den vesle byen
Dhulikhel, tre mil utanfor Kathmandu, hovudstaden i Nepal. I nord kan ein
på klare dagar sjå veldige, snøkledde fjell, fleire
av dei over åtte tusen meter høge. Campus ligg rundt ein bakketopp
i eit kupert landskap, der åsane stig bratt frå dei fruktbare
elveslettene og kastar seg ned i djupe dalar. Det aller meste av dette
området i sørhellinga av Himalaya er kulturlandskap, kledd
med terrassar som er forma av bøndene gjennom generasjonar. Sjølv
1500 meter over havet er klimaet slik at bøndene dyrkar korn og
grønsaker om vinteren. Om sommaren, når monsunen kjem med
kraftig regnver i tre-fire månader, er det tid for å planta
ris. Bøndene driv jorda for hand eller brukar bøflar til
å dra ein enkel treplog, slik dei har gjort i uminnelege tider. Midt
i dette tradisjonelle jordbrukssamfunnet lærer unge studentar kybernetikk,
web-teknologi og mikrobiologi.
Arbeidsløyse
Men er det rett å eksportera moderne teknologi
til ein slik jordbrukskultur? Eldar Onsøyen, trøndar med
doktorgrad i maskinteknikk frå NTH, har tenkt ein del på det
i dei to åra han har undervist ved Kathmandu University.
- Sjølvsagt er det langt frå problemfritt.
Over 80% av folket arbeider med jordbruk, men folketalet aukar raskt. Det
er ikkje lenger arbeid for alle i jordbruket, og då må dei
skapa sine eigne arbeidsplassar, til dømes innan industri eller
tenesteyting. Det krev utdanning. Utan lokal universitetsutdanning må
studentar ut av landet, og då kan det vera vanskeleg å få
dei tilbake. Vi meiner Nepal treng utvikling, og høgare teknisk
utdanning er ein føresetnad for å få det, seier Eldar
Onsøyen.
Norsk støtte
Drivkrafta bak Kathmandu University er Suresh
Raj Sharma, nepalsk kjemikar med utdanning frå England. Han var frustrert
over det statlege universitetet i heimlandet, som han meinte var meir oppteke
av å auka talet på innskrivne studentar enn av å tilby
god undervisning. Sharma byrja å arbeida med å oppretta eit
alternativ. Hausten 1991 vedtok parlamentet ei lov som gav rom for å
oppretta det nye universitet. Dette var den første saka som vart
handsama av den første demokratisk valde regjeringa etter revolusjonen
i 1990. Kontakten med styresmaktene er sikra ved at statsministeren formelt
leier styret for universitetet, men universitetet er organisert som ei
privat stifting.
For å finansiera utbygginga tok Sharma kontakt
med ei rekke ulike organisasjonar. Den norske misjonæren og sivilingeniøren
Odd Hoftun fekk spørsmål om å bidra med å få
i gang ei ingeniørutdanning. Hoftun har arbeidd i Nepal sidan 1960-åra
og har mellom anna bygd kraftverk og starta yrkesskule og fleire ingeniørverksemder
der. Gjennom Hoftun og organisasjonen han arbeider for, Den norske Tibetmisjon,
fekk universitetet både litt Norad-støtte og fleire norske
lærarar til ingeniørutdanninga.
Sjølvberande
Inge Johansen, pensjonert professor og tidlegare
NTH-rektor, vart engasjert til å laga ein rammeplan for bachelor-programma
i ingeniørfag og naturfag. Johansen har seinare vore rådgjevar
for universitetet og besøkt det ei rekke gonger.
- Dette var det første tilbodet i ingeniørfag
på dette nivået i Nepal, fortel Johansen. - No har det statlege
Tribhuvan University også oppretta tilsvarande tilbod i maskin- og
elektrofag, men Kathmandu University er framleis åleine om å
tilby datautdanning på dette nivået.
Universitetet har langt att før nivået
kan måla seg med til dømes NTNU, men Johansen er likevel nøgd.
- Miljøet der er allereie sjølvberande.
Fleire kull er allereie utdanna, og dei fleste av lærarane kjem frå
Nepal. Men universitetet er skjørt og treng framleis støtte.
Det viktigaste vil vera å få i gang eit master-program. Det
vil sikra større forskingsaktivitet, og det er nødvendig
for å driva undervisning på dette nivået, seier den gamle
NTH-rektoren. Han minner om at NTH også var avhengig av utanlandske
lærarar i starten.
Biologisk mangfald
Nepal er eit av dei fattigaste landa i verda om
ein måler etter gjennomsnittsinntekt, helsestell eller utdanningsnivå.
Når ein kjem frå eit norsk universitet, er det ikkje lett å
skjøna korleis det er mogleg å klara seg med spartansk utstyrte
undervisningslokale og forsvinnande små utstyrsbudsjett. Særleg
for ingeniørutdanninga og for tunge laboratoriefag som fysikk og
kjemi er dette ein begrensande faktor. Då er det lettare å
vera biolog, og det er nok ein av grunnane til at biologi er det naturfaget
som er best utvikla ved Kathmandu University. Universitetet har eit eige
bachelor-program i biologi og miljøfag. Dei første utvekslingsstudentane
frå Canada tok eksamen i biologi denne våren, og fleire er
på veg. All undervisning vert allereie gjeven på engelsk, og
det er difor lett å ta imot utanlandske studentar.
- Nepal er ideelt for biologiundervisning. På
berre nokre dagar kan vi gå gjennom ei rekke vegetasjonssoner, frå
subtropisk lågland berre nokre titals meter over havet til dei høgaste
fjellområda i verda. Det gjer både flora og dyreliv svært
variert og spanande, reklamerer dr. Chettri, leiaren for avdelinga for
biologi og miljøfag.
Dyrt
Kathmandu University får lite statleg støtte,
og drifta er difor betalt hovudsakleg med skulepengar. Fem-seks hundre
kroner i månaden er dyrt i eit land der gjennomsnittleg årsinntekt
berre er rundt 2000 kroner. Det statlege universitetet er billegare og
vert dermed eit førsteval for mange søkjarar. Kathmandu University
har no omlag 1200 studentar, men ein del av desse tek kurs som i nivå
tilsvarar norsk vidaregåande skule.
Samarbeid med NTNU
Denne våren har Kathmandu University
underteikna ein samarbeidsavtale med NTNU. Frå hausten kan universitetslærarar
og studentar koma til Trondheim for å læra meir.
- Utviklingshjelp er nok vårt hovudmotiv.
Vert samarbeidet vellukka, vil vi også tena på det, seier fakultetsdirektør
Åge Søsveen ved Fakultet for maskinteknikk.
Mastergrad
Fleire norske lærarar med utdanning frå
NTNU var med på å starta bachelor-program i ingeniørfag
ved Kathmandu University i 1994, og tidlegare NTH-rektor Inge Johansen
er framleis rådgjevar for universitetet. Difor var det naturleg å
venda seg til Trondheim for å sikra fagleg grunnlag for å utvida
universitetet vidare.
- For to år sidan fekk vi spørsmål
om å vera med på å bygga opp eit mastergradsprogram ved
Kathmandu University, fortel fakultetsdirektør Åge Søsveen
ved Fakultet for maskinteknikk.
- Vi søkte om støtte frå Norad
til eit forprosjekt, som vart gjennomført i samarbeid mellom NTNU
og eit indisk universitet. No har vi søkt Norad om støtte
til sjølve programmet. Vi må få dekka dei økonomiske
utlegga våre, men bortsett frå det går vi inn i dette
på eit fagleg idealistisk grunnlag, seier Søsveen. Potensialet
for vasskraft vert rekna som stort også i Nepal, og vasskraftmiljøa
i Trondheim vil vera sentrale i samarbeidet.
Fjernundervisning
Åge Søsveen fortel at det kan vera
aktuelt at ein del av master-programmet vert gitt som fjernundervisning
leia frå Trondheim, men det er avhengig av Norad-finansiering. Det
kan også vera aktuelt at NTNU-lærarar reiser til Nepal for
kortare periodar. Den samarbeidsavtalen som er underteikna, opnar allereie
for at lærarar og studentar frå Nepal kan koma til Trondheim.
For lærarar er det snakk om ordinær gjesteforskar-ordning.
Dei fleste ingeniørlærarane ved Kathmandu University er unge
og har lita forskingserfaring, og arbeid i større miljø vil
difor vera nyttig.
- Dei fleste faga våre vert underviste på
norsk, så for studentar er det nok mest aktuelt å gjennomføra
ei prosjektoppgåve her. Vi har allereie mange utanlandske studentar
her som arbeider slik, seier Søsveen.
Vasskraft
Åge Søsveen håpar at miljøet
i Trondheim også vil nyta godt av samarbeidet.
- Det viktigaste området vil nok vera vasskraft,
og der har dei i Nepal nokre spesielle utfordringar, mellom anna sterkt
innslag av sand og ureining i elvevatnet. For oss kan det vera nyttig å
ha kontakt med fagfolk som kjenner desse problema godt, seier Søsveen.
Han håpar også å få sjansen til å tilby fjernundervisning
til Kathmandu University.
- Etter- og vidareutdanning vert stadig viktigare
for NTNU. Erfaring med fjernundervisning i Nepal vil vera nyttig for oss
også på den heimlege utdanningsmarknaden, seier Søsveen
og legg til at samarbeidet også gjev norske lærarar og studentar
erfaring i å arbeida i andre kulturar.
- I tillegg håpar vi at koplinga til India
kan vera nyttig for oss. Det aktuelle universitetet, Birla Institute of
Technology nær Delhi, held høg kvalitet, og dei skal vera
særleg gode på å utvikla samarbeid mellom universitet
og næringsliv.
Trur framleis på svakt demokrati
Våren for ti år sidan stod studentar
i spissen då titusenvis av demonstrantar i Kathmandu tvinga kongen
til å gje frå seg makta og innføra demokrati. Ti år
seinare er mange skuffa.
Demonstrantane hadde ikkje berre ein draum om
eit demokratisk styresett, men også om økonomisk utvikling,
meir rettferdig fordeling og betre utdanning. No har folk flest tilsynelatande
mist trua på demokratiet.
- Politikarane er korrupte og tenkjer berre på
seg sjølve, svarar mange når ein spør dei om politikk.
Andre er meir radikale. Eit venstreorientert politisk parti som kallar
seg maoistar, har gripe til våpen for å kjempa mot korrupsjon
og statleg vanstyre. Nesten 2000 personar er drepne sidan uroa starta for
fire år sidan. Dagleg kan avisene fortelja om drap eller kampar mellom
politi og maoistar. Det viktigaste målet for maoistane er politifolk
eller offentlege kontor, som dei anklagar for korrupsjon. Ei rekke uskuldige
har også vorte offer for maoist-angrep eller motreaksjonar frå
politiet, i følge Amnesty International. I mai i år opna statsministeren
for å bruka hæren mot opprørarane. Skjer det, har det
tradisjonelt så fredelege Nepal fått ein heil liten borgarkrig.
Uroa har til no vore avgrensa til nokre område og har ikkje vore
retta mot utanlandske turistar.
Yadav Pandit underviser no ved Kathmandu University.
Revolusjonsvåren var han 19 år gamal og aktiv i demonstrasjonane.
69 personar omkom, og fleire forsvann. Nokre av dei var venene hans. Pandit
skjønar godt maoistane, men er sjølv aktiv medlem av det
regjerande kongresspartiet.
- Eg kjenner fleire maoistar. Men eg trur den
valdelege linja dei har valt, er feil. Alle ser at mange politikarar er
korrupte, men problemet kan ikkje løysast med vald.
Yadav Pandit har mastergrad i fysikk. Ved sidan
av jobben som universitetslærar studerer han vidare og håpar
på eit doktorgradsstipend til eit vestleg land.
- Utdanning er det viktigaste for å sikra
demokratiet. Skulesystemet kan bli mykje betre. Vi treng lokale helsearbeidarear,
jordbruksekspertar og ingeniørar, folk med gode faglege kvalifikasjonar
og kjennskap til livet på landsbygda her. Å utvikla eit godt
utdanningssystem er dyrt, men det er nødvendig om ein skal få
bukt med fattigdomen. Utan kompetanse er det ikkje mogleg å skaffa
reint drikkevatn, til dømes. Problemet no er at mange av planleggarane
er utdanna i utlandet, og det er vanskeleg for dei å skjøna
lokale problem. Eg håpar at min generasjon ser annleis på det,
at vi greier å heva levestandarden til folk flest. Berre slik er
det mogleg å sikra at folk ikkje blir frustrerte og misser trua på
folkestyret.
Nepal
Kongedøme som grensar mot India i sør
og Tibet i nord.
Rundt 23 millionar innbyggarar. 90 prosent av
dei lever på landsbygda. Folketalet veks med 2,5 prosent årleg.
Kulturelt og religiøst ber det preg av
å vera ein smeltedigel der indisk og tibetansk kultur møtest.
Landet har over 30 ulike språk og nesten 100 etniske grupper.
Fram til 1951 var Nepal nesten heilt isolert,
og statsminister-jobben gjekk i arv. Makthavarane såg på land
og folk som personleg eigedom. Utdanning berre for eliten ? fem prosent
av folket kunne lesa og skriva i 1952.
Nokre få år med demokrati på
50-talet. Så styrt av ein nesten eineveldig
konge fram til 1990. Inspirert av revolusjonane i Aust-Europa og med støtte
frå India greidde opposisjonspartia å velta regimet våren
1990. Landet fekk så eit parlamentarisk system etter engelsk modell.
Landet har hatt
ni regjeringar sidan 1990. Dei siste åra
har ei venstreorientert geriljagruppe skapt uro i nokre område.
Økonomisk er landet mellom dei fattigaste
i verda, med gjennomsnittsinntekt på rundt 2000 kroner i året.
Sterk auke i folketalet gjer at jordbruket ikkje lenger kan brødfø
alle. Arbeidsløyse er difor eit problem.
Utdanningssystemet er kraftig forbetra, og no
kan over halvparten av folket lesa. Kvaliteten på den offentlege
skulen er likevel jamt over dårleg. Høgare utdanning er også
mangelfull.
Turisme er ei viktig næring. Forholda for
fjellvandring er fantastiske, med spektakulære fjell, vakker natur
og mangfaldig kultur. Mount Everest og dei fleste andre fjelltoppar over
8000 meter ligg i eller på grensa til Nepal.
Nepal er eit hovudsamarbeidsland for norsk bistand.
Kathmandu University ligg idyllisk til tre mil
utanfor storbyen Kathmandu.
Professor Surendra Raj Kafle meiner samarbeid
med utanlandske universitet er nødvendig for å kunna tilby
utdanning av høg kvalitet. |
HANS MAGNE ÅDLAND
|