Debatt
Etter- og vidareutdanning og IKT ved NTNU
Dersom NTNU vil bli leiande innan forsking på og bruk
av IKT i undervisningssamanheng, bør ein så snart
som råd sørgje for at det blir oppretta offisielle
IKT-miljø som har dette som eit definert fagområde.
Det er då viktig at ein kombinerer kunnskapen og erfaringane
til dei som arbeider med IKT ut ifrå ein meir teknisk
synsvinkel, og dei som brukar IKT i samband med fagleg retta
praktisk-pedagogisk verksemd. Eit godt organisert IKT-miljø
ved NTNU er ein føresetnad for at etter- og vidareutdanninga
(EVU) skal kunne komme opp på eit nivå som er akseptabelt
for eit universitet. Ein treng derfor eit profesjonelt fagleg
«senter» for EVU der kompetanse frå ulike
fagfelt er samla. Eit slikt senter vil dessutan kunne utnytte
dei finansielle ressursane på ein mykje betre måte
enn om ein overlèt alt utviklingsarbeid til småmiljø
utan kontakt med kvarandre.
EVU vil bli stadig viktigare etter kvart som talet på
«ordinære» studentar går ned. I framtida
vil ein basere seg meir og meir på bruk av IKT, som gjer
det lett å skaffe seg nye kunnskapar og formell kompetanse
utan omsyn til t.d. geografisk plassering. Dette vil mest truleg
resultere i at EVU vil komme opp på eit nivå tilsvarande
grunnutdanninga.
EVU må sjølvsagt vere forankra i den faglege verksemda
ved NTNU. Ein kan likevel utvikle spesiell kompetanse innan
EVU for enkelte prioriterte fagområde og knytte denne
kompetansen opp mot eit praktisk-pedagogisk IKT-miljø
ved NTNU. På den måten vil det vere mogleg for den
enkelte faglæraren/programutviklaren å vidareutvikle
seg, og det vil òg vere lettare for nye personar å
komme i gang med EVU.
EVU er også eit effektivt rekrutteringstiltak. Dersom
ein legg til rette for internettbaserte EVU-kurs (og grunnutdanningskurs),
vil ein nå mange fleire potensielle studentar. I mange
tilfelle vil ein kunne auke studenttalet med 50% eller meir
dersom ein legg til rette for gode fjernundervisningstilbod.
Senter for etterutdanning (SEU) har i mange år vore ein
serviceinstitusjon for bl.a. SVT,- HF- og KB/FIM-fakulteta (og
andre interesserte miljø) når det gjeld EVU. SEU
er eitt av dei miljøa ved NTNU som har lengst erfaring
innan EVU, og mange er interesserte i kompetansen på SEU
fordi ein har eit heilskapleg syn på etter- og vidareutdanning,
som kombinerer fag, utvikling og administrasjon. NTNU ønskjer
derimot eit klart skilje mellom fag og administrasjon, noko
som er svært vanskeleg dersom ein skal kunne tilby tilfredsstillande
EVU til eksterne studentar. EVU er ikkje noko ein kan drive
med «på si» ved sida av den vanlege faglege
verksemda. EVU krev faktisk større innsats av faglæraren
(og administrasjonen) enn vanleg on-campus-undervisning. Førelesingane
må vere nøye utarbeidde, det formelle må
vere i orden, og ein må ta seg av sosiale aspekt i mykje
større grad enn i forhold til ordinære studentar.
Dette er ikkje noko den «vanlege» universitetslæraren
tenkjer mykje over i dag. EVU stiller større krav til
fagleg-pedagogisk bevisstheit og sosialt engasjement til faglæraren
enn ordinær undervisning. Dei færraste av dei som
er tilsette på institutta ved NTNU i dag, har kompetanse
på EVU - og det er heller ikkje lett å skaffe seg
slik kompetanse, med mindre ein sjølv leitar opp relevante
personar. Det er vanskeleg å sjå at NTNU på
den måten vil kunne byggje opp eit aktivt EVU-miljø
av høg fagleg kvalitet. Det er heller ikkje lett å
sjå at NTNU videre med den sjølvdefinerte
administrative funksjonen skal kunne bidra til å byggje
opp eit slagkraftig EVU-miljø.
Eg er for tida bl.a. engasjert i eit samarbeidsprosjekt (Realfagsuniversitetet)
mellom UiO, HiA og NTNU. NTNU si gruppe skal utarbeide eller
finne fram til eit praktisk system for organiseringa av EVU
vha. IKT. Realfagsuniversitetet har hittil bruka to studentar
frå IDI som har utvikla eit system for PLU (FPPU). Samtidig
har Geografisk institutt utvikla eit system, og språkfaga
på HF (LINGO) er også i gang med eit nettbasert
undervisningssystem. ITEA har sitt kurshotell, og IDI
har eit system som ser ut til å bli kommersielt. Det finst
sikkert fleire utviklingsprosjekt, og det er openbert at dette
er ressurssløsing og uheldig for den samla kompetansen
ved NTNU. Dersom dei som er involverte i EVU, var samla i eit
IKT-miljø der ein kunne utarbeide og evaluere system
i samarbeid, ville ein kunne oppnå mykje meir på
kortare tid. Det ville også verke mykje meir seriøst
overfor eksterne samarbeidspartnarar dersom NTNU hadde klare
mål og strategiar på dette området.
Eg sit elles også i ei arbeidsgruppe saman med representantar
frå NKS, BI og Høgskolen i Lillehammer for å
diskutere EVU for Skattedirektoratet. Ein blir konsekvent omtalt
som «tilbydar», men det er vanskeleg å sjå
at NTNU per i dag har så mykje konkret å tilby,
samanlikna med dei kommersielle tilbydarane når det gjeld
behovsretta EVU. Eg føler heller ikkje at det er noka
konkret hjelp å få frå NTNU i form av mandat
eller strategi - eller eit arbeids-/referansemiljø.
Slik situasjonen er no, må kvart enkelt fagmiljø
vurdere sjølv kva ein kan gjere for å komme i gang
med EVU. NTNU videre er i praksis ikkje til særleg
mykje større hjelp enn at ein blir lokka med incentivmiddel
og administrativt hjelp. NTNU videre seier sjølv
at ein ikkje skal blande fag og administrasjon, fagleg hjelp
er derfor ikkje mogleg å få der. Kven skal så
representere fagkompetansen innan etter- og vidareutdanning
ved NTNU?
Når det gjeld den tekniske kompetansen, er det heilt
klart at datamiljøet, representert ved IDI, er sentralt.
På den andre sida er dette miljøet også prega
av eigne faglege interesser. Som ein serviceinstitusjon har
ITEA derimot ei heilt anna stilling i forhold til fakulteta
og institutta. Bl.a. er tradisjonen for å tenkje praktisk
og brukarretta mykje større på ITEA. Ved sida av
NTNU-vidare ser det derfor ut til at ITEA bør vere éin
sentral del innan etter- og vidareutdanningsmiljøet ved
NTNU. Spørsmålet er derimot kva form eit eventuelt
fagleg-pedagogisk senter for etter- og vidareutdanning skal
ha, og om ein skal organisere noko nytt, eller byggje på
det som er etablert og som har eit nettverk.
Jens Haugan
Senter for etterutdanning